再見您和我的青春 —- Kobe Bryant

Kobe Bryant   仲記得當日仲係中學生,唔知做乜放緊假嘅我,開住當年買咗嘅有線165NBA台, 睇住Kobe上半場只係入咗26分,湖人落後十幾廿分,好無癮咁hea睇, 然後,一球3分,一球2分,又一球3分,再一球2分…… 最後佢拎咗81分。 好興奮嘅我,拎起電話,求其打畀幾個friend,講「Kobe拎咗81分呀!一個人呀!」   Kobe、AI、Vince Carter、T-Mac、姚明、Gilbert Arenas、Garnett、Paul Pierce、Dirk、Manu、Duncan、Ray Allen、Dwyane Wade、Lebron、Anthony,甚至Chris Bosh…… 呢班就係當年嘅明星隊。當年每個我都好欣賞,覺得又睇得又打得嘅「球星」。 其中Kobe、 AI、 Vince Carter、 T-Mac,係我最鍾意嘅,原因無他嘅,射得剷得,一個人入40、50分,我認,我就係鍾意睇呢啲,一夫當關嘅球員。 如今佢地全部都走哂啦…… 但係Kobe同AI果種打不死精神,果種「型」,永遠都忘記唔到,亦係呢種精神,令當日嘅我不斷打波、不斷打波。   原來咁就20年。果個連續4場入50+ ,3節62分,連續9場40+嘅佢,變到而家每晚拎30分、甚至20分都吃力。 仲記得佢拎得分皇果季,季初睇下個得分榜:37.5PPG。最後果季佢平均35分,AI 33分。 仲記得當初佢對Boston兩連冠之後斷欖,做唔到第二次3-peat果下。我果陣堅信,佢隔年會返來,再帶Lakers去另一個皇朝,超越Jordan。 即使到對勇士嘅Achilles Tendon斷裂,我仍然相信,佢會打得返起。因為佢係Kobe。佢係世上最最最勤力、意志最堅定嘅球員。 但可惜,佢從此就一沉不起。   20年過去。當日幸福嘅學生,今日已經變咗一個要出來社會做嘢,講嘢要有分寸,做嘢要有交帶負責任,每日受氣都要吞咗佢嘅「大人」。[…]